Ձեզ մի իրավիճակ ներկայացնեմ։
Արկտիկայում կան Անովա կոչվող թանկարժեք քարի հանքեր։ Մի արդյունահանող խումբ փորձում է արդյունահանել հնարավորինս մեծ քանակով Անովա։
Անհրաժեշտ է հիշել մի քանի բան․
1․ Ամեն բարեհաջող արդյունահանված Անովա քարի հետ վնասվում և ոչնչացվում է մեկ այլ Անովա քար։
2․ Հյուսիսային բևեռի Արկտիկան դեռևս միակ տեղն է, որտեղ կարելի է գտնել Անովա քարից։
3․ Որոշ գիտնականներ ունեն հիփոթեզ, որ Հյուսիսային բևեռում Անովայի պաշարները 100 տարի հետո կվերջանան։
4․ Գիտնականների մի այլ խումբ ենթադրում է, որ Անովայի պաշարներ կարող են լինել նաև հարավային բևեռում, սակայն, ոչ մի խումբ դեռևս դա չի հաստատել։

Այս իրավիճակում ձեզ առաջարկում եմ 3 հնարավոր որոշում․

1․ Ստեղծել մեքենա, որը Անովա կարդյունահանի երկու անգամ ավելի արագ։
2․ Ստեղծել մեքենա, որը այնպես կարդյունահանի քարը, որպեսզի մեկ այլ Անովա չոչնչանա։
3․ Մեկնել հարավային բևեռ և փնտրել Անովա քարի հանքեր այնտեղ։

Հարց։ Ո՞ր որոշումն է արդյունահանող խմբի համար լավագույնը։

Հետաքրքիր քննարկում ստացվեց։

Այժմ պատկերացրեք՝ Արկտիկայում Անովայի արդյունահանման վրա աշխատում է երեք խումբ։ Եկեք բաժանվենք երեք թիմի՝ ըստ երեք արդյունահանող խմբերի։ Ձեր խմբի անունը կարող եք որոշել ինքներդ։

Մարզիչը պատահականության սկզբունքով ուսանողներին բաժանում է խմբերի։

Թիմերը կարող են աշխատել միասին, արդյունահանել ավելի շատ Անովա և վերջում որևէ կերպ բաժանել արդյունահանած Անովան կամ կարող են աշխատել առանձին։ Երեք խմբերին ներկայացված են նույն երեք հնարավոր որոշումները․

ա․ Ստեղծել մեքենա, որը Անովա կարդյունահանի երկու անգամ ավելի արագ։
բ․ Ստեղծել մեքենա, որը այնպես կարդյունահանի քարը, որպեսզի մեկ այլ Անովա չոչնչանա։
գ․ Մեկնել հարավային բևեռ և փնտրել Անովա քարի հանքեր այնտեղ։

Խմբերը չեն կարող ընդունել միևնույն որոշումը, սակայն կարող են քննարկել միասին, թե որ թիմը որ որոշումն է ընդունելու։ Խմբերը միմյանց ստել չեն կարող։
Խմբերի նպատակն է ստանալ հնարավորինս շատ շահույթ՝ հասցնելով հնարավորինս քիչ վնաս։

Խաղ-քննարկումը կավարտվի երբ, բոլոր երեք խմբերը գան համաձայնության․

1․ Երեք որոշումների թիմերի միջև բաշխման մասին
2․ Որոշումների հնարավոր բացասական հետևանքները հասցեագրելու մասին
3․ Համատեղ կամ միայնակ աշխատելու մասին։
4․ Եթե թիմերը աշխատում են միասին, արդյունահանած Անովան հավասար կամ անհավասար բաժանելու մասին

Յուրաքանչյուր թիմում պետք է լինեն հետևյալ գործառույթը կատարող մարդիկ․

1․ Բնապահպան-գիտնական - պետք է օգնի թիմին ընդունել ճիշտ որոշումներ՝ էկոկայունության տեսանկյունից
2․ Բիզնես խորհրդատու - պետք է օգնի թիմին ընդունել որոշումներ, որոնք առավելագույն շահույթը կբերեն խմբին
3․ Բանակցություններ վարող - պետք է հաղորդակցության դուրս գա մնացած երկու խմբերի հետ՝ խմբի նպատակներին հասնելու համար։

Խաղը ունի հետևյալ կառուցվածքը․

Փուլ 1։ Խմբի ուժեղ կողմերի վեր հանում և դերերի բաշխում
Փուլ 2։ Առաջին քննարկում խմբի ներսում
Փուլ 3։ Առաջին բանակցություն խմբերի միջև
Եթե համաձայնություն բոլոր հարցերի շուրջ չկա․
Փուլ 4։ Երկրորդ քննարկում խմբի ներսում
Փուլ 5։ Վերջին բանակցություն խմբերի միջև
Խաղը ավարտվում է։ Եթե համաձայնություն կա բոլոր երեք/չորս հարցերի շուրջ, թիմերը ավարտում են հաջողությամբ, եթե ոչ՝ ձախողմամբ։

Քայլ 1։ Ծանոթացում խմբի հետ
Ծանոթացեք և դուրս բերեք յուրաքանչյուրի ուժեղ կողմերը և ըստ ուժեղ կողմերի՝ կատարեք դերերի բաշխում (ուսանողների քանակից կախված՝ նույն դերը կարող են կատարել մի քանի մարդիկ)։ Այս քայլի համար ունեք առավելագույնը 5 րոպե ժամանակ։

Քայլ 2։ Առաջին քննարկում խմբի ներսում
Դուք ունեք 10 րոպե ժամանակ, որպեսզի ողջ թիմով միաձայն որոշեք․

ա․ արդյոք ցանկանում եք համագործակցել որևէ խմբի/խմբերի հետ, ցանկանում եք միայնակ աշխատել կամ գուցե գնալ փոխզիջման
բ․ որոշումներից ո՞րն է ընդունելու ձեր թիմը։
գ․ ի՞նչ հարցեր ունեք մյուս խմբերի համար, ինչպիսի՞ ելույթ եք ունենալու բանակցությունների փուլի ժամանակ։
Ձեր որոշումները կարող են փոփոխվել բանակցության փուլից հետո։

Քայլ 3։ Բանակցությունների առաջին փուլ

Երեք խմբերի բանակցություններ վարող անդամները ունեն 7 րոպե ժամանակ միմյանց հարցեր տալու, երեք հարցերի շուրջ համաձայնության գալու համար։

Եթե բոլոր հարցերի շուրջ համաձայնություն չի հաստատվում․

Քայլ 4։ Երկրորդ քննարկում խմբի ներսում

Առաջին բանակցությունների արդյունքների հիման վրա՝ խումբը ընդունում է որոշումներ և պատրաստվում սեփական ելույթին վերջին բանակցությունների փուլի համար։ Այս քայլի համար ունեք առավելագույնը 5 րոպե ժամանակ։

Քայլ 5 Բանակցությունների վերջին փուլ

Երեք խմբերի բանակցություններ վարող անդամները հանդիպում են՝ փորձելու գալ վերջնական համաձայնության բոլոր 3 հարցերի շուրջ։ Այս քայլի համար ունեք առավելագույնը 5 րոպե ժամանակ։

Եթե համաձայնություն կրկին չի հաստատվում, մարզիչը դադարեցնում է խաղը՝ հայտնելով, որ թիմերը չկարողացան գալ համաձայնության

Տեղափոխվենք Մեքսիկա՝ գիտական ձեռքբերումների ցուցահանդես, որտեղ պրոֆեսոր Սանդրա Պասկո Օրտիզը ցուցադրում է իր՝ կակտուսի հյութից ստացվող բիոպլաստիկը։ Սա հիանալի գաղափար է և այսպիսի բիոպլաստիկից պատրաստված տոպրակներ, բաժակներ, շշեր կարելի է պատրաստել մեծ ծավալով։

Եկեք մի իրավիճակ պատկերացնենք։ Կակտուսից ստացվող բիոպլաստիկի ստացման ընթացքը և դրա բաղադրությունը ամբողջովին պարզ է և կարելի է այն հասցնել մեծ ծավալների արտադրության։ Խնդիրն այն է, որ բացի այս ոլորտում աշխատող գիտական համայնքից և էկոկայունության խորը գիտելիքներ ունեցող մարդկանցից՝ բոլորը թերահավատորեն են մոտենում այս պլաստիկին և չեն ցանկանում գնել այն։
Ձեր նպատակն է լուծել այս խնդիրը՝ այն է ի՞նչ անել որպեսզի այս բիոպլաստիկից կամ տոպրակները կամ բաժակներ կամ ձեր ընտրությամբ այլ բիոպլաստիկե իր գրավի մարդկանց ուշադրությունը և դրդի նրանց գնել այն։

Սակայն այս խնդիրը լուծելու համար չենք սկսելու զրոյական կետից։ Ես ձեզ կտրամադրեմ լուսանկարներ, պատմություններ, տեսահոլովակներ այնպիսի երևույթների մասին, որոնք որևիցե կապ չունեն բիոպլաստիկի կամ պլաստիկի հետ։ Առաջին հայացքից իրար հետ կապ չունեցող ոլորտների ու երևույթների միջև կապեր գտնելն է օգնում մեզ ստեղծել հանճարեղ արտադրանքներ ու լուծել խնդիրներ։

Ձեր խնդիրն է ուսումնասիրել ձեզ տրված ռեսուրսները և դրանցից ոգեշնչվելով ու դրանց վրա հիմնվելով՝ լուծել բիոպլաստիկից պատրաստված ապրանքների վաճառքի խնդիրը։ Դուք կարող եք անել բիոպլաստիկի հետ ցանկացած բան, անգամ, եթե այն ներկայում իրատեսական չի թվում։ Կարող եք օգտվել միաժամանակ տարբեր օրինակներից կամ կենտրոնանալ մեկի վրա։ Կարևոր է, որպեսզի վերջում կարողանաք բացատրել, թե ինչպես է տրված օրինակը կապվում ձեր գյուտին, արտադրանքին։

Կարող եք ստեղծել մանրակրկիտ նկարագրություն ձեր բիոպլաստիկե տոպրակի/բաժակի կամ այլ արտադրանքի համար և նաև նկարել այն թղթի վրա կամ ստեղծել պատկեր համակարգչով։ Դուք կարող եք օգտագործել ձեզ հասանելի ցանկացած գործիք։

Կարող եք աշխատել խմբերով կամ առանձին։

Ունեք 15 րոպե ժամանակ

Մարզիչը հպանցիկ ցուցադրում է բոլոր ռեսուրսները հետո, լուսանկարներն ու տեսահոլովակների հղումները տրամադրում նաև զրուցարանում։

Այժմ պատկերացրեք, որ դուք ձեր բիոպլաստիկի արտադրանքի գաղափարը պետք է ներկայացնեք գերխոշոր սննդի ցանցի տնօրենի, որի սննդի կետերում ահռելի քանակով պլաստիկե արտադրանք է օգտագործվում։

Ձեր ելույթը պետք է շատ հակիրճ և պատմության ձևով ներկայացնի ձեր բիոպլաստիկից արտադրանքը և բացատրի՝ ինչու նա պետք է իր սննդի ցանցի համար գնի հենց ձեր արտադրանքը։ Ելույթի տևողությունը չպետք է գերազանցի 2 րոպեն։

Ելույթը պետք է կազմված լինի երկու տեսակի նախադասություններից՝ էմոցիոնալ և ռացիոնալ։ Սկսեք էմոցիոնալ նախադասությամբ և հերթափոխեք տեսակները։

Էմոցիաները, որոնք դուք ձեր ելույթի միջոցով կառաջացնեք, կարող են լինել և՛ դրական, և՛ բացասական՝ վախ, բարկություն․ լարվածություն, ոգևորվածություն, երջանկություն և այլն։ Հիանալի կլինի եթե դուք կարողանաք բարկություն առաջացնել ներկայիս խնդրի մասին և ոգևորություն ապագայի մասին, երբ խնդիրն արդեն լուծված կլինի։ Տրամաբանական նախադասությունները հիմնեք թվերի, փաստերի ու ցանկացած տվյալների այլ աղբյուրների վրա։ Կարող եք անգամ ձեր կողմից ստեղծված նկարներ օգտագործել։ Պատրաստվելու համար ձեզ կտամ 10 րոպե ժամանակ:

Ամեն ելույթից հետո ներկայացնողին պետք է խումբը հղի առնվազն մեկ հարց և ներկայացնողը պետք է ստանա առնվազն մեկ հետադարձ կապ իր ելույթի մասին։ Հետադարձ կապը պետք է լինի ելույթի և՛ դրական, հաջողված մասերի, և՛ բարելավման կարիք ունեցող հատվածների մասին։

Այլ մասնակիցների ելույթների ժամանակ կարող եք նաև նշումներ անել՝ հաջող հետադարձ կապ տրամադրելու համար։